مغردون يردون على إحراج السيسي لمحافظ القاهرة: معاه شهادة أعلى منك

وقال السيسي مخاطباً المحافظ: "هل تعرف صندوق العشوائيات عندك بيجمع فلوس كام؟، ماتعرفش... ودخل المحافظة كام؟"، وحين حاول عبد العال الرد قائلاً "المحافظة يا فندم"، قاطعه السيسي بالقول: "تصدق وتؤمن بالله أنا عارف دخل مصر كام بالحتة... إذا ماكنتش تعرف كل جنيه في محافظتك، هاتعظمه إزاي، وتستفيد منه... طب أنت عارف اتعملك كام كوبري في الأربع سنوات الماضية؟!".

وأضاف السيسي: "أنا ماقصدش حاجة، بس عايز أقول إنك لازم تكون عارف كل حاجة لما تقعد تتكلم مع الناس... أقولهم خلي بالكم أنا عملت كذه، والدولة عملت كذه، وده أقصى حاجة عندنا... أنا ماقصدش خالص (أحرجك)، وأقصد إن كل زمايلنا اللي بيتكلموا مع الناس، إني حافظ كل حاجة عشان أرد على الناس".

وقال حسن سيد معلقاً: "أنا لو مكان محافظ القاهرة أقدم استقالتي فوراً، بس أنا متأكد إنه مش هايقدر يعمل كده"، مضيفاً: "على فكرة مش محافظ القاهرة بس اللي مش عارف أي حاجة في أي حاجة، ولا عارف اللي بيحصل في محافظته... أغلب محافظين مصر مش على دراية بأي شيء، ونايمين في العسل".

في المقابل، قال حساب تحت اسم "تكفني الذكرى": "بيعاملهم (السيسي) كأنهم تلاميذ عنده، والمشكلة إن أقل واحد فيهم معاه شهادة أعلى منه"، وبدوره، قال محمد سامي: "عارف الناس البسيطة عايشة إزاي يا ريس، والأسعار معاهم عاملة إزاي؟!"، وقال عياد الألفي: "ماحدش بيشتغل، وكله قافش (متمسك) في الكرسي والفلوس، غير البدلات والحوافز والذي منه... أهم شيء لتعيين المحافظ إنه يكون من أبناء المؤسسة العسكرية!".

وقال ناصر عنتر: "السيسي قاصد يكسف الشرطة في كل مكان (المحافظ لواء شرطة سابق). بينما علق محمد فراج: "محافظ القاهرة هو أهم مسؤول يحتك بالمواطنين، وما حدث شيء كارثي... ومهمة الحكومة إنها ترتقي بأداء المحافظين، لأنهم رؤساء محافظاتهم... لكن اللي بيحصل في الدولة حالياً سيئ جداً".

وقال كامل مصطفى: "هو المحافظ لسه ماقدمش استقالته، وطب والنبي ده كلام... لازم يقدم استقاله فوراً"، فيما قال مجدي أبو علي مخاطباً السيسي: "طب ما ينزل هو أرض الواقع، ويشوف بنفسه الشوارع الخربانة، والقهاوي اللي بقت مالية الشوارع، والمواصلات الزحمة وغير الآدمية... ويشوف البلطجية اللي في كل شوارع القاهرة، ويشوف الفوضى اللي في العشوائيات، ومعاملة الناس داخل أقسام الشرطة وخارجها!".

وقالت رضوى خالد: "محافظ مهزأ، ويقبل بهذا الأمر مقابل المكاسب"، وعلق أحمد عبد السلام: "لما واحد مش عارف دخل محافظته كام، هايصرف عليها إزاي؟، لكن له العذر فوزير المالية لا يبوح بهذه الأسرار العسكرية إلا لرئيس الجمهورية، والباقي مش مهم"، وقال محمود عطية: "وماسألتوش ليه يا ريس عن كام معتقل من أصحاب الرأي والسياسيين في السجون؟!".

وفي 24 مايو/ أيار 2017، احتد السيسي على نائب البرلمان الحاصل على دكتوراه في القانون الجنائي، أبو المعاطي مصطفى، خلال افتتاح مشروع للأثاث، لمطالبته بتأجيل زيادة أسعار الوقود والكهرباء لحين رفع الحد الأدنى للأجور، قائلاً له: "إنت مين؟ ونواب إيه؟ إنت دارس الموضوع اللي بتتكلم فيه"، علماً أن السيسي نفسه قال قبل أيام قليلة: "إنه لو أخذ بدراسات الجدوى ما كان نفذ 20 في المئة من المشروعات الحالية".