محمد علي يدعو لتظاهرات جديدة ويسأل السيسي: قصور اللواءات "منين"؟

في البداية، وجه علي العزاء للشعب المصري في مقتل 8 من الجنود المصريين في هجوم على كمين تفاحة، في بئر العبد شمال سيناء، وسخر من استمرار حفل تأييد السيسي الذي تم الجمعة، عند منصة النصب التذكاري للجندي المجهول، في مدينة نصر قائلاً: "هل يعقل وحياة ولادك إن إنت النهاردة عندك شهداء ماتوا، وانت تعمل حفلة في المنصة تثبت للناس إن هي بتحبك؟ الإعلاميين والفنانين والناس اللي نزلت عند المنصة، مش كان الأجمل والأحسن إنكم تهدوا الليلة دي وتتكلوا على الله تروحوا؟".

ووجه رسالته إلى الرئيس السيسي مذكراً إياه بتصريح سابق: "الرئيس عبد الفتاح السيسي كان بيقول ياريتني كنت معاهم (يقصد: يا ريتني كنت أنا) طب ما تنزل ياريس تحارب معاهم ، بلاش إنت إبعت محمود إبنك يروح يحارب معاهم، واللا انت خايف على ولادك اللي في الرقابة الإدارية واللا اللي في المخابرات".

واستكمل متساءلاً: "حضرتك أنا اللي بواجهك، حضرتك دي وجهة نظري، قبضت ليه على أصحابي؟ قبضت ليه على الموظفين اللي كانوا في أملاك؟ وقبضت على أصحاب مراتي اللي منفصل عنها بقالي سنتين؟".

وعن نتائج الإصلاح الاقتصادي قال: "ممكن تبعت للإعلاميين بتوعك، بتوع للكيلو 4 ونص، يقولولنا إيه اللي حصل من تجديدات والناس حست بإيه؟ ممكن تنزلهم أرض اللواء، ممكن تنزلهم أبو قتاتة؟ ممكن تقولنا الناس حست بإيه من التغيير واللا انتم بتهتموا بالمناطق اللي انتم ساكنين فيها بس والمناطق التانية ما تلزمكوش".

وأضاف: "سد النهضة اللي انت لبسته لـ25 يناير، مش حضرتك طلعت تقريباً مع رئيس إثيوبيا وقعدت تحلفه بانتصار، إن ما يخدش حاجة من حصة المية اللي بتوصل لمصر من النيل واللا ده كان مين؟".

ودخل بالحديث إلى منحى آخر ذكر في بالأسماء لواءات في الجيش المصري، لافتاً الأنظار حول ثرواتهم: "حضرتك طلعت سالت اللواء مش فاكر اسمه (ل. محمد عبد الحي) انت بتقبض كام قالك 14200 جنيه". وتابع "اللواء محمود نصر رئيس هيئة الشؤون المالية اللي مشي، ممكن حضرتك تقوللي القصر اللي عايش فيه ده جابه منين؟".

وقال علي "اللواء طارق البرقوقي، اللواء أحمد نعيم، اللواء خالد فودة، اللواء كامل الوزير، اللواء محمد أمين رئيس هيئة الشؤون المالية، اللواء شريف صلاح صاحبك اللي قاعد ورا الشويفات، اللواء محمود عبد البر، اللواء طاهر عبد الله، اللواء خالد عرابي، اللواء ماجد جورج، دول اللي افتكرتهم، ممكن تقوللي اللواءات دي جابت القصور والفلل دي منين؟".

وأضاف "وعندك لواءات عايشة في الحي العاشر في زهراء مدينة نصر، إيه السبب إن دول عايشين كده ودول عايشين كده؟".

وأضاف علي "خلي بالك ياريس إنت عندك موضوع مفضوح قوي في الجيش، بتبنوا شقق كتير للسادة الظباط وعماير كتير، والمصريين رايحين جايين شايفينها، الظابط ياريس بياخد الشقة صندوق الإسكان بتاع القوات المسلحة، بيطلعها له بـ 500 ألف أو مليون جنيه، بيبيعها وهي لسه ورق بياخد عليها أوفر هيد 200 – 300 ألف جنيه، انتم بتدوهم لقمة صغيرة عشان يصهينوا على اللقمة الكبيرة بتاعتك ما إنت الحرامي الكبير".

واستكمل تساؤلاته: "رايح تبني قصور يا راجل شوف المدارس وشف النجوع وشوف بحري ده فيه قرى ما دخلتهاش مية، سيناء العظيمة سيناء الجميلة حتة ألماظة خالد فودة وأنا قاعد معاه في المحافظة، قال الرئيس كتر خيره عمل كرتونة في زيت وسكر وشاي ونزل لحمة".

وتابع: "نيجي للسؤال المهم معالي السيد رئيس الجمهورية عبد الفتاح السيسي إنت حاطط الحد الأدنى للأجور كام في مصر؟ هانقول 2000 جنيه – 3000 جنيه أنا ما اعرفش، أنا باطالب حضرتك أو المتحدث الرسمي ليك يطلع يفنط ال 3000 جنيه دول، مواطن مصري، وزوجة، وطفلين ما انت بتقول تحديد النسل وانت مخلف 4، يطلع يحللهم لـ3000 دول لمدة 30 يوم إزاي يعيش بيهم المواطن المصري".

واستعرض محمد علي بالصورة الفرق بين مستشفيات أبو الريش وامبابة والعجوزة والتي تفتقر للإمكانيات، في مقابل القصور الرئاسية، وغياب الأولويات وحاجات الشعب الأساسية.

وخاطب السيسي: "بتقول أنا ممكن أعملكم تفويض تنزلوا، ده لسة هالاعبك بالتفويض ده، بس أنا هاوريك أنا هاعمل فيك إيه يا أوزعة، والله لا هاتنام ليل ولا نهار".

وحمّل مسؤولية العمليات الإرهابية للرئيس السيسي، بسب تدخل الجيش في الحياة الاقتصادية، بعيداً عن دوره الأهم في حماية البلاد والحدود من دخول المخدرات، والسلاح.
وخاطب الشعب المصري قائلاً: "تقبلوا على الرئيس بتاعكم إن الرئيس ترامب يقوله يا ديكتاتور؟".

وتوعد السيسي: "وإن شاء الله قريب هاتمشي، إعدام، محاكمتك إعدام ، حق الناس اللي ماتوا في سيناء واللي انت أعدمتهم جوه المحاكم". ومن الجدير بالذكر أن وسم #موعدنا_بعد_الماتش بعد أقل من 30 دقيقة أصبح الوسم رقم 1 في مصر.