#بلاك_فرايداي المصري: "أيامنا كلها بقت سودة"

رغم استمرار حرائق إسرائيل ووقوع هجوم كبير على كمين للجيش المصري في العريش، استطاعت الجمعة السوداء، أو #بلاك_فرايداي جذب اهتمام المصريين على مواقع التواصل الاجتماعي.

المواقع المؤيدة للنظام واللجان الإلكترونية، استخدمت صوراً، وفيديوهات الـ"بلاك فرايداي" وزحامه كدليل على نظرية "المصريين معاهم فلوس"، مع سخرية ونقد للناشطين. فسيطر الحدث على مواقع التواصل، ليتقدم وسم #بلاك_فرايداي قائمة الأكثر تداولاً على تويتر، وكذلك وسوم عن الحدث تحت اسم أشهر المجمعات التجارية في مصر.

سياسة، اقتصاد، سخرية، وكوميكس، كانت ملخص مشاركات رواد التواصل، فالحساب الساخر الذي يحمل اسم عبد الفتاح السيسي، خاطب المصريين: "‏يعني أنتوا لسه معاكوا فلوس وبتشتروا في البلاك فرايداي؟ وربنا لأبهدلكوا".

أما علي فتعجب: "‏بلاك فرايداى إيه يا حبيبتي؟ ما احنا كل أيامنا سودة"، وانتقد حمدي اهتمام السوشيال قائلا: "‏خبر استشهاد ١٠ و ١٥ جندي في سينا بقى عادي لدرجة إنه مش لاقي له مكان وسط اهتمام المصريين بحرايق إسرائيل أو عروض البلاك فرايداي".

بدوره، شكا عمرو الهواري، "أنا منزلتش في البلاك فرايداي ومش هنزل لو عملتوا أيام الأسبوع كلها بلاك داي، كده كده مامعييش فلوس أشتري حاجة حتى بعد الخصم" وسخرت نجوين من تبرعات السيسي: "طب ما تجيبوا جاكت عشان خاطر مصر #بلاك_فرايداي".

أما ايفيت، فرأت الزحام في مكان آخر: "قالك #بلاك_فرايداى، عاوزين تعرفوا الطوابير فين؟ تعالوا شوفوا أنا نزلت لقيت سوبر ماركت بيم عليه زحمة وناس بتزاحم عشان عامل كيلو الرز ب 4.5"، وسخر مصري: "أنت لو سألت الشعب المصرى يعنى إيه #بلاك_فرايداي؟ نص هيفتكره نوع سمنة جديدة، والنص التاني هيفتكره حبوب منع الحمل".

ورأى محمد أن الزحمة ظاهرة صحية: "صور المصريين رغم الأزمة الاقتصادية في #بلاك_فرايداي حاجة تفرح، في 2011 مكناش بنشوف حد بالشارع حتى اللي معاه ملايين، الأمن والأمان لا يقدر بثمن"، وعلق محمود: "البلاك فرايداي دا بره، لكن اللي بيحصل هنا اسمه نصب، إنه يرفع الأسعار قبلها بفترة و بعدين ييجى يعمل sale فتنزل لنفس السعر الأصلى #بلاك_فرايداي".

اللافت هو سخرية حساب "ثورة 25 يناير" واللعب على نفس منطق الكتائب: "بقي دا منظر ناس عندها مشاكل في التموين والزيت والسكر والبنزين؟ ويقولك ثورة جياع! #بلاك_فرايداي #كايرو_فستيفال #سيتي_ستارز #مول_العرب". واقترحت جوليا حلاً للزحمة: " بعد بكرة بلاك فرايدي تخفيضات وعروض وحاجات، الواحد يدخل بين الطوابير يقول الله اكبر، كله يجري ويخاف واحنا نشتري".